main us aalam mein aa pahuncha tumhaare dard-e-hijran se

maiñ us a.alam meñ aa pahuñchā tumhāre dard-e-hijrāñ se

kabhī tūfāñ hai kashtī se kabhī kashtī hai tūfāñ se

karam meñ bhī sitam kā zauq kar letā huuñ yuuñ paidā

maiñ aksar chāk-e-dil siitā huuñ unkī nok-e-mizhgāñ se

nasheman jal chukā hai bijliyāñ ab kyuuñ chamaktī haiñ

koī tinkā bacha hai kyā abhī jashn-e-charāġhāñ se

jigar TukḌe garebāñ chaak nishtar aañkh aur dil meñ

matā-e’-zindagī nikle haiñ ye vahshī ke sāmāñ se

asīroñ kī rihā.ī kī ḳhabar aa.ī jo zindāñ meñ

lipaT kar ro diye qaidī dar-o-divār-e-zindāñ se

agar ābād karnā ho kisī vīrān gulshan ko

zarā sī kHāk-e-dīvāna bhī le aanā bayābāñ se

'hasan' bas husn-e-jānāñ hī hai maz.hab dīn-o-millat bhī

na hindū se ġharaz ham ko na matlab hai musalmāñ se

main us aalam mein aa pahuncha tumhaare dard-e-hijran se

kabhi tufan hai kashti se kabhi kashti hai tufan se

karam mein bhi sitam ka zauq kar leta hun yun paida

main aksar chaak-e-dil sita hun unki nok-e-mizhgan se

nasheman jal chuka hai bijliyan ab kyun chamakti hain

koi tinka bacha hai kya abhi jashn-e-charaghan se

jigar TukDe gareban chaak nishtar aankh aur dil mein

mata-e’-zindagi nikle hain ye wahshi ke saman se

asiron ki rihai ki KHabar aai jo zindan mein

lipaT kar ro diye qaidi dar-o-diwar-e-zindan se

agar aabaad karna ho kisi viran gulshan ko

zara si kHak-e-diwana bhi le aana bayaban se

'hasan' bas husn-e-jaanan hi hai mazhab din-o-millat bhi

na hindu se gharaz hum ko na matlab hai musalman se