KHana-ba-dosh hain na hi daman-darida log

ḳhāna-ba-dosh haiñ na hī dāman-darīda log

chehroñ ko dekh ham haiñ masāfat-kashīda log

chashme ubal paḌe haiñ jo sahrā meñ jā-ba-jā

do chaar din rahe the yahāñ āb-dīda log

parvāz kī sakat na sahī tajraba to hai

mumkin hai kaam aa.eñ kahīñ par-burīda log

tā'bīr kuchh batāo ki tadbīr kar sakūñ

ḳhvāboñ meñ aa rahe haiñ ka.ī barguzīda log

un kī nazar meñ hech hai ye vus'at-e-falak

baiThe haiñ bazm-e-yār meñ jo sar-ḳhamīda log

ab to hasad kā saaz hai aur nafratoñ ke giit

ab to haiñ ḳhāl-ḳhāl yahāñ ḳhush-’aqīda log

maanā 'jamāl' jazba-e-kāmil hai tere paas

chalte haiñ rāh-e-'ishq pe lekin chunīda log

KHana-ba-dosh hain na hi daman-darida log

chehron ko dekh hum hain masafat-kashida log

chashme ubal paDe hain jo sahra mein ja-ba-ja

do chaar din rahe the yahan aab-dida log

parwaz ki sakat na sahi tajraba to hai

mumkin hai kaam aaen kahin par-burida log

ta'bir kuchh batao ki tadbir kar sakun

KHwabon mein aa rahe hain kai barguzida log

un ki nazar mein hech hai ye wus'at-e-falak

baiThe hain bazm-e-yar mein jo sar-KHamida log

ab to hasad ka saz hai aur nafraton ke git

ab to hain KHal-KHal yahan KHush-’aqida log

mana 'jamal' jazba-e-kaamil hai tere pas

chalte hain rah-e-'ishq pe lekin chunida log