خانہ بدوش ہیں نہ ہی دامن دریدہ لوگ

خانہ بدوش ہیں نہ ہی دامن دریدہ لوگ

چہروں کو دیکھ ہم ہیں مسافت کشیدہ لوگ

چشمے ابل پڑے ہیں جو صحرا میں جا بجا

دو چار دن رہے تھے یہاں آب دیدہ لوگ

پرواز کی سکت نہ سہی تجربہ تو ہے

ممکن ہے کام آئیں کہیں پر بریدہ لوگ

تعبیر کچھ بتاؤ کہ تدبیر کر سکوں

خوابوں میں آ رہے ہیں کئی برگزیدہ لوگ

ان کی نظر میں ہیچ ہے یہ وسعت فلک

بیٹھے ہیں بزم یار میں جو سر خمیدہ لوگ

اب تو حسد کا ساز ہے اور نفرتوں کے گیت

اب تو ہیں خال خال یہاں خوش عقیدہ لوگ

مانا جمالؔ جذبۂ کامل ہے تیرے پاس

چلتے ہیں راہ عشق پہ لیکن چنیدہ لوگ