gul-e-harif teri zulf ki panah mein hai

gul-e-harīf tirī zulf kī panāh meñ hai

'ajab charāġh-e-raqābat shab-e-siyāh meñ hai

do-ātisha hai ye sho'ala jo merī aah meñ hai

ki mere saath mirā ḳhvāb qatl-gāh meñ hai

kahīñ use hī na kahte hoñ sūr-e-isrāfīl

'ajīb shor-e-qiyāmat dil-e-tabāh meñ hai

asar na ho kisī sahrā-navard kā un par

ye iztirāb-e-musalsal jo mehr-o-māh meñ hai

fasīl-e-chashm pe kitne charāġh raushan haiñ

koī to hai jo abhī dil kī ḳhānqāh meñ hai

sambhal ke tiir chalā dil pe lag na jaa.e kahīñ

ye ek terā sipāhī mirī sipāh meñ hai

kuchh aur hai to kabhī sāmne vo le aa.eñ

ye ‘arsh-o-farsh to kab se mirī nigāh meñ hai

uḌī huī haiñ havā kī havā.iyāñ bhī 'jamāl'

ki ik charāġh abhī tak mirī panāh meñ hai

gul-e-harif teri zulf ki panah mein hai

'ajab charagh-e-raqabat shab-e-siyah mein hai

do-atisha hai ye sho'ala jo meri aah mein hai

ki mere sath mera KHwab qatl-gah mein hai

kahin use hi na kahte hon sur-e-israfil

'ajib shor-e-qiyamat dil-e-tabah mein hai

asar na ho kisi sahra-naward ka un par

ye iztirab-e-musalsal jo mehr-o-mah mein hai

fasil-e-chashm pe kitne charagh raushan hain

koi to hai jo abhi dil ki KHanqah mein hai

sambhal ke tir chala dil pe lag na jae kahin

ye ek tera sipahi meri sipah mein hai

kuchh aur hai to kabhi samne wo le aaen

ye ‘arsh-o-farsh to kab se meri nigah mein hai

uDi hui hain hawa ki hawaiyan bhi 'jamal'

ki ek charagh abhi tak meri panah mein hai