istiKhaara ya munajat nahin kar sakte

istiḳhāra yā munājāt nahīñ kar sakte

ham ḳhudā se bhī tirī baat nahīñ kar sakte

kaun se kaam kī ḳhātir mujhe bulvāyā hai

jo tire shahar ke suqrāt nahīñ kar sakte

ham vo darvesh kabhī lā se jo aage na ga.e

nafī kar deñ to phir isbāt nahīñ kar sakte

abr-o-bārān meñ haiñ girya-kunāñ arz-o-samā

bil-mushāfa jo mulāqāt nahīñ kar sakte

kaisī qadġhan hai ki bas dekhte rahnā hai use

jaane vaale se savālāt nahīñ kar sakte

jo bhī hai apne hī karmoñ kā natīja hai 'jamāl'

shikva-e-talḳhi-e-hālāt nahīñ kar sakte

istiKHara ya munajat nahin kar sakte

hum KHuda se bhi teri baat nahin kar sakte

kaun se kaam ki KHatir mujhe bulwaya hai

jo tere shahar ke suqraat nahin kar sakte

hum wo darwesh kabhi la se jo aage na gae

nafi kar den to phir isbaat nahin kar sakte

abr-o-baran mein hain girya-kunan arz-o-sama

bil-mushafa jo mulaqat nahin kar sakte

kaisi qadghan hai ki bas dekhte rahna hai use

jaane wale se sawalat nahin kar sakte

jo bhi hai apne hi karmon ka natija hai 'jamal'

shikwa-e-talKHi-e-haalat nahin kar sakte