استخارہ یا مناجات نہیں کر سکتے

استخارہ یا مناجات نہیں کر سکتے

ہم خدا سے بھی تری بات نہیں کر سکتے

کون سے کام کی خاطر مجھے بلوایا ہے

جو ترے شہر کے سقراط نہیں کر سکتے

ہم وہ درویش کبھی لا سے جو آگے نہ گئے

نفی کر دیں تو پھر اثبات نہیں کر سکتے

ابر و باران میں ہیں گریہ کناں ارض و سما

بالمشافہ جو ملاقات نہیں کر سکتے

کیسی قدغن ہے کہ بس دیکھتے رہنا ہے اسے

جانے والے سے سوالات نہیں کر سکتے

جو بھی ہے اپنے ہی کرموں کا نتیجہ ہے جمالؔ

شکوۂ تلخئ حالات نہیں کر سکتے