ashk sab zaKHm khurach kar nikal aae hain mere

ashk sab zaḳhm khurach kar nikal aa.e haiñ mire

maiñ to samjhā thā rafūgar nikal aa.e haiñ mire

dekhiye aap kī ḳhātir maiñ ne kyā kyā na kiyā

paañv chādar se bhī bāhar nikal aa.e haiñ mire

vo jo kahtā thā ki paiġhām nahīñ milte mujhe

us ke āñgan se kabūtar nikal aa.e haiñ mire

kaise inkār ho jab qālū-balā kī sūrat

dastaḳhat bhī sar-e-mahshar nikal aa.e haiñ mire

vo jo ātish-zada alfāz adā kar na sakā

aable ban ke zabāñ par nikal aa.e haiñ mire

un ko shāyad nahīñ andāza riyāzat kā mirī

jin ko lagtā hai ki ab par nikal aa.e haiñ mire

sochtā hogā falak dekh ke parvāz-e-bashar

ye zamīñ-zād barābar nikal aa.e haiñ mire

kis kī āvāz pe labbaik kahā maiñ ne 'jamāl'

ḳhud-ba-ḳhud paañv safar par nikal aa.e haiñ mire

ashk sab zaKHm khurach kar nikal aae hain mere

main to samjha tha rafugar nikal aae hain mere

dekhiye aap ki KHatir main ne kya kya na kiya

panw chadar se bhi bahar nikal aae hain mere

wo jo kahta tha ki paigham nahin milte mujhe

us ke aangan se kabutar nikal aae hain mere

kaise inkar ho jab qalu-bala ki surat

dastaKHat bhi sar-e-mahshar nikal aae hain mere

wo jo aatish-zada alfaz ada kar na saka

aable ban ke zaban par nikal aae hain mere

un ko shayad nahin andaza riyazat ka meri

jin ko lagta hai ki ab par nikal aae hain mere

sochta hoga falak dekh ke parwaz-e-bashar

ye zamin-zad barabar nikal aae hain mere

kis ki aawaz pe labbaik kaha main ne 'jamal'

KHud-ba-KHud panw safar par nikal aae hain mere