qasam KHuda ki tujhe bas KHuda nahin samjha

qasam ḳhudā kī tujhe bas ḳhudā nahīñ samjhā

vagarna is ke sivā aur kyā nahīñ samjhā

'ajab hai tujh se bichhaḌ ke nikhar gayā huuñ maiñ

ḳhizāñ meñ phuul ye kaise khilā nahīñ samjhā

isī liye to mujhe mushkiloñ ne gher liyā

jahāñ pe thā maiñ vahāñ kī havā nahīñ samjhā

tamām 'umr rahegā ye rañj saath mire

ki merī baat koī dūsrā nahīñ samjhā

vo jis ke baa'd har ik ġham ḳhushī meñ Dhal jaa.e

maiñ zindagī kā vahī marhala nahīñ samjhā

tū pūchhtā hai ki ḳhāmosh guftugū kyā hai

tū dil se dil kā yahī rābta nahīñ samjhā

'jamāl' us ne agar kah diyā to kyā laḌnā

vo kaun hai jo hameñ sar-phirā nahīñ samjhā

qasam KHuda ki tujhe bas KHuda nahin samjha

wagarna is ke siwa aur kya nahin samjha

'ajab hai tujh se bichhaD ke nikhar gaya hun main

KHizan mein phul ye kaise khila nahin samjha

isi liye to mujhe mushkilon ne gher liya

jahan pe tha main wahan ki hawa nahin samjha

tamam 'umr rahega ye ranj sath mere

ki meri baat koi dusra nahin samjha

wo jis ke ba'd har ek gham KHushi mein Dhal jae

main zindagi ka wahi marhala nahin samjha

tu puchhta hai ki KHamosh guftugu kya hai

tu dil se dil ka yahi rabta nahin samjha

'jamal' us ne agar kah diya to kya laDna

wo kaun hai jo hamein sar-phira nahin samjha