wah saqiya tera mai-kada aabaad hai aabaad hai

vaah sāqiyā terā mai-kada ābād hai ābād hai

aur bāda-ḳhvāroñ ke liye har dam mubārakbād hai

ye baada kyā ik naar hai man-o-tū se us kī ḳhaar hai

ik jar'a ne fauran mujhe ab kar diyā barbād hai

aisā fanā kī aag meñ jal kar fanā hī ho rahā

na maiñ rahā na kuchh merā baaqī na mujh ko yaad hai

sar-e-mū nahīñ baaqī rahā ab tū hī tū har aan meñ

tū tū ke kahne se bhī ye banda terā āzād hai

pas kuchh nahīñ huuñ kaun huuñ aur kyā huuñ kaise huuñ kahāñ

ye tujh binā ab kaun hai aur kis kā ye irshād hai

na thā kabhī na huuñ abhī na hūñgā maiñ phir phir kabhī

na ḳhaak hai na aab hai na ātish-o-na baad hai

pas huuñ agar to 'aib huuñ juz 'aib ke aur kuchh nahīñ

bas 'aib merā naam hai aur 'aib kī buniyād hai

kyā shaad hai kyā shaad hai na kam hai na īzād hai

ābād na barbād na muhtāj na āzād hai

kaho re 'hasīñ' ab kaun hai kyā phir tū hovegā kabhī

kar tauba apnī tauba se tauba terī ilhād hai

wah saqiya tera mai-kada aabaad hai aabaad hai

aur baada-KHwaron ke liye har dam mubarakbaad hai

ye baada kya ek nar hai man-o-tu se us ki KHar hai

ek jar'a ne fauran mujhe ab kar diya barbaad hai

aisa fana ki aag mein jal kar fana hi ho raha

na main raha na kuchh mera baqi na mujh ko yaad hai

sar-e-mu nahin baqi raha ab tu hi tu har aan mein

tu tu ke kahne se bhi ye banda tera aazad hai

pas kuchh nahin hun kaun hun aur kya hun kaise hun kahan

ye tujh bina ab kaun hai aur kis ka ye irshad hai

na tha kabhi na hun abhi na hunga main phir phir kabhi

na KHak hai na aab hai na aatish-o-na baad hai

pas hun agar to 'aib hun juz 'aib ke aur kuchh nahin

bas 'aib mera nam hai aur 'aib ki buniyaad hai

kya shad hai kya shad hai na kam hai na izad hai

aabaad na barbaad na muhtaj na aazad hai

kaho re 'hasin' ab kaun hai kya phir tu howega kabhi

kar tauba apni tauba se tauba teri ilhad hai