falak par jo shams-o-qamar dekhte hain

falak par jo shams-o-qamar dekhte haiñ

to ham apnā dāġh-e-jigar dekhte haiñ

sunā hai ye jab se vo haiñ aane vaale

to phir phir ke dīvār-o-dar dekhte haiñ

vo ā.īna ke rū-ba-rū mahv-e-sūrat

idhar dekhte haiñ udhar dekhte haiñ

shafaq un kī āñkhoñ meñ kiyā jalva-gar hai

ki shām-o-sahar dopahar dekhte haiñ

nazākat kī had hai ki har har qadam par

vo chalne se pahle kamar dekhte haiñ

na marte haiñ but par na hūroñ pe zāhid

tamāshā sanam kā magar dekhte haiñ

kalīsā ho kā'ba ho yā tūr-e-sīnā

sab us ke hī jalva kā ghar dekhte haiñ

vahī hai ‘hasīr’ aap kahte haiñ sab se

jise kū-ba-kū dar-ba-dar dekhte haiñ

falak par jo shams-o-qamar dekhte hain

to hum apna dagh-e-jigar dekhte hain

suna hai ye jab se wo hain aane wale

to phir phir ke diwar-o-dar dekhte hain

wo aaina ke ru-ba-ru mahw-e-surat

idhar dekhte hain udhar dekhte hain

shafaq un ki aankhon mein kiya jalwa-gar hai

ki sham-o-sahar dopahar dekhte hain

nazakat ki had hai ki har har qadam par

wo chalne se pahle kamar dekhte hain

na marte hain but par na huron pe zahid

tamasha sanam ka magar dekhte hain

kalisa ho ka'ba ho ya tur-e-sina

sab us ke hi jalwa ka ghar dekhte hain

wahi hai ‘hasir’ aap kahte hain sab se

jise ku-ba-ku dar-ba-dar dekhte hain