ziya-e-mehr hai nur-e-qamar he

ziyā-e-mehr hai nūr-e-qamar he

jamāl-e-yār har-sū jalva-gar hai

sarishk-e-shauq ke rutbe haiñ aalī

ki un se āstīn-e-husn tar hai

nahīñ ik dil hī betāb-e-ġham-e-hijr

ki hāl-e-jāñ bhī kuchh nau-e-digar hai

chale haiñ phoḌne ko sar kahāñ ham

ki us dar tak bhalā kis kā guzar hai

hai zāhid ko bhī fikr-e-tark-e-duniyā

ġharaz yaañ rañj se kis ko mafar hai

dil-e-muztar ko DhūñDo us galī meñ

vahīñ hogā kahīñ maujūd agar hai

vazīfe sab chhuTe ik naam terā

duā-e-shām hai vird-e-sahar hai

ba-zāhir be-ḳhabar hai aql-e-'hasrat'

haqīqat meñ use sab kuchh ḳhabar hai

ziya-e-mehr hai nur-e-qamar he

jamal-e-yar har-su jalwa-gar hai

sarishk-e-shauq ke rutbe hain aali

ki un se aastin-e-husn tar hai

nahin ek dil hi betab-e-gham-e-hijr

ki haal-e-jaan bhi kuchh nau-e-digar hai

chale hain phoDne ko sar kahan hum

ki us dar tak bhala kis ka guzar hai

hai zahid ko bhi fikr-e-tark-e-duniya

gharaz yan ranj se kis ko mafar hai

dil-e-muztar ko DhunDo us gali mein

wahin hoga kahin maujud agar hai

wazife sab chhuTe ek nam tera

dua-e-sham hai wird-e-sahar hai

ba-zahir be-KHabar hai aql-e-'hasrat'

haqiqat mein use sab kuchh KHabar hai