ضیائے مہر ہے نور قمر ہے

ضیائے مہر ہے نور قمر ہے

جمال یار ہر سو جلوہ گر ہے

سرشک شوق کے رتبے ہیں عالی

کہ ان سے آستین حسن تر ہے

نہیں اک دل ہی بیتاب غم ہجر

کہ حال جاں بھی کچھ نوع دگر ہے

چلے ہیں پھوڑنے کو سر کہاں ہم

کہ اس در تک بھلا کس کا گزر ہے

ہے زاہد کو بھی فکر ترک دنیا

غرض یاں رنج سے کس کو مفر ہے

دل مضطر کو ڈھونڈو اس گلی میں

وہیں ہوگا کہیں موجود اگر ہے

وظیفے سب چھٹے اک نام تیرا

دعائے شام ہے ورد سحر ہے

بظاہر بے خبر ہے عقل حسرتؔ

حقیقت میں اسے سب کچھ خبر ہے