parde se ek jhalak jo wo dikhla ke rah gae

parde se ik jhalak jo vo dikhlā ke rah ga.e

mushtāq-e-dīd aur bhī lalchā ke rah ga.e

gum-karda rāh-e-ishq fanā kyuuñ na ho gayā

ehsāñ jo us pe ḳhizr-o-masīhā ke rah ga.e

ā.īne meñ vo dekh rahe the bahār-e-husn

aayā mirā ḳhayāl to sharmā ke rah ga.e

jab āshiqoñ se sadma-e-hijrāñ na uTh sakā

āḳhir ko ek rose vo sam khā ke rah ga.e

jab vo chhuTā to kuchh na rahā dil meñ ik magar

dāġh-e-firāq us gul-e-ra.anā ke rah ga.e

milne kī un se ek bhī sūrat na ban paḌī

saare musavvade dil-e-dānā ke rah ga.e

bebāk thā ze-baski mirā iztirāb-e-shauq

sharmā ke vo kabhī kabhī jhuñjhlā ke rah ga.e

dil kī lagī bujhā bhī vo sakte to baat thī

ye kyā huā ki aag hī bhaḌkā ke rah ga.e

aa.e bhī vo chale bhī ga.e vo misāl-e-barq

dil hī meñ hausle dil-e-shaidā ke rah ga.e

kyā dil meñ aa ga.ī jo ze-rāh-e-kamāl-e-rahm

da.avā vo mere qatl kā farmā ke rah ga.e

pahle to ḳhuun merā bahāyā ḳhushī ḳhushī

phir kyā vo ḳhud hī soche ki pachhtā ke rah ga.e

da.avā-e-āshiqī hai to 'hasrat' kaaro nibāh

ye kyā ki ibtidā hī meñ ghabrā ke rah ga.e

parde se ek jhalak jo wo dikhla ke rah gae

mushtaq-e-did aur bhi lalcha ke rah gae

gum-karda rah-e-ishq fana kyun na ho gaya

ehsan jo us pe KHizr-o-masiha ke rah gae

aaine mein wo dekh rahe the bahaar-e-husn

aaya mera KHayal to sharma ke rah gae

jab aashiqon se sadma-e-hijran na uTh saka

aaKHir ko ek rose wo sam kha ke rah gae

jab wo chhuTa to kuchh na raha dil mein ek magar

dagh-e-firaq us gul-e-rana ke rah gae

milne ki un se ek bhi surat na ban paDi

sare musawwade dil-e-dana ke rah gae

bebak tha ze-baski mera iztirab-e-shauq

sharma ke wo kabhi kabhi jhunjhla ke rah gae

dil ki lagi bujha bhi wo sakte to baat thi

ye kya hua ki aag hi bhaDka ke rah gae

aae bhi wo chale bhi gae wo misal-e-barq

dil hi mein hausle dil-e-shaida ke rah gae

kya dil mein aa gai jo ze-rah-e-kamal-e-rahm

dawa wo mere qatl ka farma ke rah gae

pahle to KHun mera bahaya KHushi KHushi

phir kya wo KHud hi soche ki pachhta ke rah gae

dawa-e-ashiqi hai to 'hasrat' karo nibah

ye kya ki ibtida hi mein ghabra ke rah gae