baam par aane lage wo samna hone laga

baam par aane lage vo sāmnā hone lagā

ab to iz.hār-e-mohabbat barmalā hone lagā

ishq se phir ḳhatra-e-tark-e-vafā hone lagā

phir fareb-e-husn sargarm-e-adā hone lagā

kyā kahā maiñ ne jo nāhaq tum ḳhafā hone lage

kuchh sunā bhī yā ki yūñhī faisla hone lagā

ab ġharīboñ par bhī saaqī kī nazar paḌne lagī

bāda-e-pasḳhurda ham ko bhī atā hone lagā

merī rusvā.ī se shikva hai ye un ke husn ko

ab jise dekho vo merā mubtalā hone lagā

yaad phir us bevafā kī har ghaḌī rahne lagī

phir usī kā tazkira sub.h-o-masā hone lagā

kuchh na pūchho haal kyā thā ḳhātir-e-betāb kā

un se jab majbūr ho kar maiñ judā hone lagā

shauq kī betābiyāñ had se guzar jaane lagīñ

vasl kī shab vā jo vo band-e-qabā hone lagā

kasrat-e-ummīd bhī aish-āfrīñ hone lagī

intizār-e-yār bhī rāhat-fazā hone lagā

ġhair se mil kar unheñ nāhaq huā merā ḳhayāl

mujh se kyā matlab bhalā maiñ kyuuñ ḳhafā hone lagā

qaid-e-ġham se tere jaañ āzād kyuuñ hone lagī

dām-e-gesū se tire dil kyuuñ rihā hone lagā

kyā huā 'hasrat' vo terā idda.ā-e-zabt-e-ġham

do hī din meñ rañj-e-furqat kā gilā hone lagā

baam par aane lage wo samna hone laga

ab to izhaar-e-mohabbat barmala hone laga

ishq se phir KHatra-e-tark-e-wafa hone laga

phir fareb-e-husn sargarm-e-ada hone laga

kya kaha main ne jo nahaq tum KHafa hone lage

kuchh suna bhi ya ki yunhi faisla hone laga

ab gharibon par bhi saqi ki nazar paDne lagi

baada-e-pasKHurda hum ko bhi ata hone laga

meri ruswai se shikwa hai ye un ke husn ko

ab jise dekho wo mera mubtala hone laga

yaad phir us bewafa ki har ghaDi rahne lagi

phir usi ka tazkira subh-o-masa hone laga

kuchh na puchho haal kya tha KHatir-e-betab ka

un se jab majbur ho kar main juda hone laga

shauq ki betabiyan had se guzar jaane lagin

wasl ki shab wa jo wo band-e-qaba hone laga

kasrat-e-ummid bhi aish-afrin hone lagi

intizar-e-yar bhi rahat-faza hone laga

ghair se mil kar unhen nahaq hua mera KHayal

mujh se kya matlab bhala main kyun KHafa hone laga

qaid-e-gham se tere jaan aazad kyun hone lagi

dam-e-gesu se tere dil kyun riha hone laga

kya hua 'hasrat' wo tera iddaa-e-zabt-e-gham

do hi din mein ranj-e-furqat ka gila hone laga