shab-e-furqat mein yaad us be-KHabar ki bar bar aai

shab-e-furqat meñ yaad us be-ḳhabar kī baar baar aa.ī

bhulānā ham ne bhī chāhā magar be-iḳhtiyār aa.ī

tire faiz-e-karam se diin ke dariyā meñ josh aayā

tire yumn-e-qadam se bāġh-e-īmāñ meñ bahār aa.ī

tirī mahfil se ai pīr-e-muġhān-e-āshiqī aksar

mashīḳhat nai-navāz aa.i fazīlat mai-gusār aa.ī

ummīdeñ tujh se thiiñ vābasta lākhoñ aarzū lekin

bahut ho kar tirī dargāh se be-e'tibār aa.ī

ilāhī rañg ye kab tak rahegā hijr-e-jānāñ meñ

ki roz-e-be-dilī guzrā to shām-e-intizār aa.ī

tirī be-e'tinā.ī ko ye āḳhir kyā ḳhayāl aayā

jo merī pursish-e-ġham ko ba-chashm-e-ashk-bār aa.ī

na haath aayā ba-juz rañj-o-balā kuchh ishq-e-'hasrat' ko

dayār-e-husn kī āb-o-havā nā-sāzgār aa.ī

shab-e-furqat mein yaad us be-KHabar ki bar bar aai

bhulana hum ne bhi chaha magar be-iKHtiyar aai

tere faiz-e-karam se din ke dariya mein josh aaya

tere yumn-e-qadam se bagh-e-iman mein bahaar aai

teri mahfil se ai pir-e-mughan-e-ashiqi aksar

mashiKHat nai-nawaz aai fazilat mai-gusar aai

ummiden tujh se thin wabasta lakhon aarzu lekin

bahut ho kar teri dargah se be-e'tibar aai

ilahi rang ye kab tak rahega hijr-e-jaanan mein

ki roz-e-be-dili guzra to sham-e-intizar aai

teri be-e'tinai ko ye aaKHir kya KHayal aaya

jo meri pursish-e-gham ko ba-chashm-e-ashk-bar aai

na hath aaya ba-juz ranj-o-bala kuchh ishq-e-'hasrat' ko

dayar-e-husn ki aab-o-hawa na-sazgar aai