nazar phir na ki us pe dil jis ka chhina

nazar phir na kī us pe dil jis kā chhīnā

mohabbat kā ye bhī hai koī qarīnā

vo kyā qadr jāneñ dil-e-āshiqāñ kī

na aalim na fāzil na daanā na biinā

ye kyā kufr-e-ne.amat hai ai shaiḳh āḳhir

ki barsāt meñ bhī pilānā na piinā

vahīñ se ye aañsū ravāñ haiñ jo dil meñ

tamannā kā poshīda hai ik ḳhazīna

bahā deñ vahāñ ḳhuun apnā jahāñ ham

tire husn kā girte dekheñ pasīnā

ye kyā qahr hai ham pe yā-rab ki be-mai

guzar jaaye sāvan kā yūñhī mahīna

bahār aa.ī sab shādmāñ haiñ magar ham

ye din kaise kāTeñge be-jām-o-mīnā

judā jab ki haiñ tujh se ai rāhat-e-jāñ

hamārā barābar hai jiinā na jiinā

miTe aib sab ishq-bāzī meñ 'hasrat'

na buġhz-o-hasad hai na ġhussa na kiina

nazar phir na ki us pe dil jis ka chhina

mohabbat ka ye bhi hai koi qarina

wo kya qadr jaanen dil-e-ashiqan ki

na aalim na fazil na dana na bina

ye kya kufr-e-neamat hai ai shaiKH aaKHir

ki barsat mein bhi pilana na pina

wahin se ye aansu rawan hain jo dil mein

tamanna ka poshida hai ek KHazina

baha den wahan KHun apna jahan hum

tere husn ka girte dekhen pasina

ye kya qahr hai hum pe ya-rab ki be-mai

guzar jaye sawan ka yunhi mahina

bahaar aai sab shadman hain magar hum

ye din kaise kaTenge be-jam-o-mina

juda jab ki hain tujh se ai rahat-e-jaan

hamara barabar hai jina na jina

miTe aib sab ishq-bazi mein 'hasrat'

na bughz-o-hasad hai na ghussa na kina