mohabbat ke ewaz rahne lage har-dam KHafa mujhse

mohabbat ke evaz rahne lage har-dam ḳhafā mujh se

kaho to aisī kyā sarzad huī āḳhir ḳhatā mujh se

mileñ bhī vo to kyūñkar aarzū bar aa.egī dil kī

na hogā ḳhud ḳhayāl un ko na hogī iltijā mujh se

qarār aatā nahīñ dil ko kisī unvān-e-pahlū meñ

huā hai āshnā jab se vo kāfir mājrā mujh se

ġhanīmat hai jahān-e-āshiqī meñ zaat donoñ kī

ki nām-e-jaur qaa.em tum se hai rasm-e-vafā mujh se

falak se bhī hai kyā baḌh kar bulandī bām-e-jānāñ kī

ye pūchhā kartī hai aksar mirī āh-e-rasā mujh se

magar sair-e-chaman ko aaj vo phir aane vaale haiñ

abhī kuchh kah rahī thī kaan meñ bād-e-sabā mujh se

mohabbat bhī ajab shai hai ki bā-vasf-e-shanāsā.ī

nahīñ hotī muḳhātab vo nigāh-e-āshnā mujh se

sukūn-e-qalb kī ummīd ab kyā ho ki rahtī hai

tamannā kī do-chār ik har ghaḌī barq-e-balā mujh se

taqāza hai yahī ḳhū-e-niyāz-e-ishq-bāzī kā

na hogā us sarāpā-nāz kā 'hasrat' gilā mujh se

mohabbat ke ewaz rahne lage har-dam KHafa mujh se

kaho to aisi kya sarzad hui aaKHir KHata mujh se

milen bhi wo to kyunkar aarzu bar aaegi dil ki

na hoga KHud KHayal un ko na hogi iltija mujh se

qarar aata nahin dil ko kisi unwan-e-pahlu mein

hua hai aashna jab se wo kafir majra mujh se

ghanimat hai jahan-e-ashiqi mein zat donon ki

ki nam-e-jaur qaem tum se hai rasm-e-wafa mujh se

falak se bhi hai kya baDh kar bulandi baam-e-jaanan ki

ye puchha karti hai aksar meri aah-e-rasa mujh se

magar sair-e-chaman ko aaj wo phir aane wale hain

abhi kuchh kah rahi thi kan mein baad-e-saba mujh se

mohabbat bhi ajab shai hai ki ba-wasf-e-shanasai

nahin hoti muKHatab wo nigah-e-ashna mujh se

sukun-e-qalb ki ummid ab kya ho ki rahti hai

tamanna ki do-chaar ek har ghaDi barq-e-bala mujh se

taqaza hai yahi KHu-e-niyaz-e-ishq-bazi ka

na hoga us sarapa-naz ka 'hasrat' gila mujh se