KHanqa se ta-dar-e-pir-e-mughan le jaega

ḳhānqa se tā-dar-e-pīr-e-muġhāñ le jā.egā

dil kahāñ se mujh ko laayā hai kahāñ le jā.egā

ab to furqat meñ taḌapnā bhī nahīñ mumkin ki tū

merī tāsīr-e-mohabbat par gumāñ le jā.egā

āshiqoñ ke hoñge rāh-e-yār meñ kyā kyā hujūm

shauq jin ko kārvāñ-dar-kārvāñ le jā.egā

jis qadar chāheñ chhupā kar dil ko ham rakheñ magar

jab vo aa.egā to ik din nā-gahāñ le jā.egā

ham za.īfān-e-mohabbat kā pahuñchnā thā muhāl

manzil-e-maqsūd tak vo naujavāñ le jā.egā

qadr hogī mere zabt-e-shauq kī us dam ayaañ

jab manā kar ḳhud mujhe vo jān-e-jāñ le jā.egā

un kī mahfil meñ jise le jā.egā baḳht-e-rasā

kāmyāb-o-kāmrān-o-shādmāñ le jā.egā

ishq naqd-e-jāñ ke badle husn ke bāzār se

muft goyā dard kī jins-e-girāñ le jā.egā

rā.egāñ 'hasrat' na jā.egā mirā musht-e-ġhubār

kuchh zamīñ le jā.egī kuchh āsmāñ le jā.egā

KHanqa se ta-dar-e-pir-e-mughan le jaega

dil kahan se mujh ko laya hai kahan le jaega

ab to furqat mein taDapna bhi nahin mumkin ki tu

meri tasir-e-mohabbat par guman le jaega

aashiqon ke honge rah-e-yar mein kya kya hujum

shauq jin ko karwan-dar-karwan le jaega

jis qadar chahen chhupa kar dil ko hum rakhen magar

jab wo aaega to ek din na-gahan le jaega

hum zaifan-e-mohabbat ka pahunchna tha muhaal

manzil-e-maqsud tak wo naujawan le jaega

qadr hogi mere zabt-e-shauq ki us dam ayan

jab mana kar KHud mujhe wo jaan-e-jaan le jaega

un ki mahfil mein jise le jaega baKHt-e-rasa

kaamyab-o-kaamran-o-shadman le jaega

ishq naqd-e-jaan ke badle husn ke bazar se

muft goya dard ki jins-e-giran le jaega

raegan 'hasrat' na jaega mera musht-e-ghubar

kuchh zamin le jaegi kuchh aasman le jaega