aashiqon se narawa hai be-wafai aap ki

āshiqoñ se nāravā hai be-vafā.ī aap kī

had se baḌh jaaye na shān-e-kaj-adā.ī aap kī

aarzū ke dil pe ā.eñgī na kyā kyā āfateñ

dar-pai-e-inkār hai nā-āshnā.ī aap kī

ḳhūb-rū haiñ aap maanā ham ne phir bhī is qadar

dekhiye achchhī nahīñ hai ḳhud-satā.ī aap kī

rah ga.ī ahl-e-havas meñ yādgār-e-husn-o-ishq

nāz-bardārī hamārī dil-rubā.ī aap kī

mujh se aksar ye kahā kartā hai vo maḳhmūr-e-nāz

dekhiye nibhtī hai kab tak pārsā.ī aap kī

ik hamīñ to kuchh nahīñ haiñ aap ke tā.at-guzār

tābe.a-e-farmāñ huī saarī ḳhudā.ī aap kī

kaise dekhe kaun dekhe aap kā nūr-e-jamāl

jaan jab Thahrī huī ho rū-numā.ī aap kī

aap ko aatā rahā mere satāne kā ḳhayāl

sulh se achchhī rahī mujh ko laḌā.ī aap kī

barq kā aksar ye kahnā yaad aatā hai mujhe

tinke chunvāne lagī ham se judā.ī aap kī

arz karke hāl-e-dil kis darja haiñ mahjūb ham

dekh kar ġhusse meñ sūrat tamtamā.ī aap kī

shāh-e-jīlāñ ke sivā mushkil-kushā ke vāste

kaun kartā aur 'hasrat' rahnumā.ī aap kī

aashiqon se narawa hai be-wafai aap ki

had se baDh jaye na shan-e-kaj-adai aap ki

aarzu ke dil pe aaengi na kya kya aafaten

dar-pai-e-inkar hai na-ashnai aap ki

KHub-ru hain aap mana hum ne phir bhi is qadar

dekhiye achchhi nahin hai KHud-satai aap ki

rah gai ahl-e-hawas mein yaadgar-e-husn-o-ishq

naz-bardari hamari dil-rubai aap ki

mujh se aksar ye kaha karta hai wo maKHmur-e-naz

dekhiye nibhti hai kab tak parsai aap ki

ek hamin to kuchh nahin hain aap ke taat-guzar

tabea-e-farman hui sari KHudai aap ki

kaise dekhe kaun dekhe aap ka nur-e-jamal

jaan jab Thahri hui ho ru-numai aap ki

aap ko aata raha mere satane ka KHayal

sulh se achchhi rahi mujh ko laDai aap ki

barq ka aksar ye kahna yaad aata hai mujhe

tinke chunwane lagi hum se judai aap ki

arz karke haal-e-dil kis darja hain mahjub hum

dekh kar ghusse mein surat tamtamai aap ki

shah-e-jilan ke siwa mushkil-kusha ke waste

kaun karta aur 'hasrat' rahnumai aap ki