aarzu lazim hai wajh-e-arzu ho ya na ho

aarzū lāzim hai vaj.h-e-ārzū ho yā na ho

iltifāt us kāfir-e-ḳhud-bīñ kī ḳhū ho yā na ho

dekhnā hai hazrat-e-dil ham se un ke rū-ba-rū

aap ke baare meñ bhī kuchh guftugū ho yā na ho

chāhte haiñ vo chaman meñ kasrat-e-husn-e-gulāb

motiyā belā chamelī naaz bū ho yā na ho

ham se kahte haiñ kareñge aaj iz.hār-e-karam

is se kuchh matlab nahīñ mahfil meñ tū ho yā na ho

ab kisī ko aur chāheñge na ham tere sivā

husn kī duniyā meñ tujh sā ḳhūb-rū ho yā na ho

kū-e-jānāñ meñ salāt-e-ishq paḌhne ke liye

dekhiye āb-e-shahādat se vuzū ho yā na ho

un se naubat laḌke phir milne kī aa.e yā na aa.e

chāk-dāmān-e-tamannā ab rafū ho yā na ho

aarzu lazim hai wajh-e-arzu ho ya na ho

iltifat us kafir-e-KHud-bin ki KHu ho ya na ho

dekhna hai hazrat-e-dil hum se un ke ru-ba-ru

aap ke bare mein bhi kuchh guftugu ho ya na ho

chahte hain wo chaman mein kasrat-e-husn-e-gulab

motiya bela chameli naz bu ho ya na ho

hum se kahte hain karenge aaj izhaar-e-karam

is se kuchh matlab nahin mahfil mein tu ho ya na ho

ab kisi ko aur chahenge na hum tere siwa

husn ki duniya mein tujh sa KHub-ru ho ya na ho

ku-e-jaanan mein salat-e-ishq paDhne ke liye

dekhiye aab-e-shahadat se wuzu ho ya na ho

un se naubat laDke phir milne ki aae ya na aae

chaak-daman-e-tamanna ab rafu ho ya na ho