آرزو لازم ہے وجہ آرزو ہو یا نہ ہو

آرزو لازم ہے وجہ آرزو ہو یا نہ ہو

التفات اس کافر خود بیں کی خو ہو یا نہ ہو

دیکھنا ہے حضرت دل ہم سے ان کے روبرو

آپ کے بارے میں بھی کچھ گفتگو ہو یا نہ ہو

چاہتے ہیں وہ چمن میں کثرت حسن گلاب

موتیا بیلا چنبیلی ناز بو ہو یا نہ ہو

ہم سے کہتے ہیں کریں گے آج اظہار کرم

اس سے کچھ مطلب نہیں محفل میں تو ہو یا نہ ہو

اب کسی کو اور چاہیں گے نہ ہم تیرے سوا

حسن کی دنیا میں تجھ سا خوبرو ہو یا نہ ہو

کوئے جاناں میں صلوٰۃ عشق پڑھنے کے لئے

دیکھیے آب شہادت سے وضو ہو یا نہ ہو

ان سے نوبت لڑکے پھر ملنے کی آئے یا نہ آئے

چاک دامان تمنا اب رفو ہو یا نہ ہو