aashna ho kar nazar na-ashna karne lage

āshnā ho kar nazar nā-āshnā karne lage

ham se kyā dekhā ki tum pās-e-hayā karne lage

rashk aayā hai mujhe kyā kyā jab un ke rū-ba-rū

mudda.ī-e-be-bāk arz-e-mudda.ā karne lage

halqa-e-aġhyār meñ bhī pā ke un ko garm-e-lutf

ham lab-e-hasrat se shor-e-marhabā karne lage

aur to kuchh bhī na ham se is ke aage ban paḌā

husn-e-ḳhalq-e-yār kī mad.h-o-sanā karne lage

dilrubā.ī kā bhī kuchh kuchh Dhab unheñ aane lagā

baat matlab kī ishāroñ meñ adā karne lage

kaun kahtā hai ki ham haiñ mā.il-e-tark-e-vafā

aap nāhaq apne dil ko bad-maza karne lage

bhuul kar hukm-e-ḳhudā yād-e-butāñ rahne lagī

kyā tumheñ karnā thā 'hasrat' aah kyā karne lage

aashna ho kar nazar na-ashna karne lage

hum se kya dekha ki tum pas-e-haya karne lage

rashk aaya hai mujhe kya kya jab un ke ru-ba-ru

muddai-e-be-bak arz-e-muddaa karne lage

halqa-e-aghyar mein bhi pa ke un ko garm-e-lutf

hum lab-e-hasrat se shor-e-marhaba karne lage

aur to kuchh bhi na hum se is ke aage ban paDa

husn-e-KHalq-e-yar ki madh-o-sana karne lage

dilrubai ka bhi kuchh kuchh Dhab unhen aane laga

baat matlab ki ishaaron mein ada karne lage

kaun kahta hai ki hum hain mail-e-tark-e-wafa

aap nahaq apne dil ko bad-maza karne lage

bhul kar hukm-e-KHuda yaad-e-butan rahne lagi

kya tumhein karna tha 'hasrat' aah kya karne lage