na ho uski KHata-poshi pe kyun naz-e-gunah-gari

na ho us kī ḳhatā-poshī pe kyuuñ nāz-e-gunah-gārī

nishān-e-shān-e-rahmat bin gayā dāġh-e-siyah-kārī

sitam tum chhoḌ do maiñ shikva-sanjī-hā-e-nā-chārī

ki farz-e-ain hai kesh-e-mohabbat meñ ravādārī

vafā se dushmanī rakh kar mire dil kī talabgārī

bahut mushkil hai is jins-e-girāmī kī ḳharīdārī

huiiñ nākāmiyāñ bad-nāmiyāñ rusvā.iyāñ kyā kyā

na chhūTī ham se lekin kū-e-jānāñ kī havādārī

vo din ab yaad aate haiñ ki āġhāz-e-mohabbat meñ

na chālākī tujhe ai shoḳh aatī hai na ayyārī

nahīñ ġham jeb-o-dāman kā magar haañ fikr hai itnī

na uTThegā mire dast-e-junūñ se rañj-e-bekārī

na chhoḌā marte dam tak saath bīmār-e-mohabbat kā

qasam khāne ke qābil hai tire ġham kī vafādārī

na un ko rahm aatā hai na mujh se sabr hai mumkin

kahīñ āsān ho yārab mohabbat kī ye dushvārī

vufūr-e-ashk-e-paiham se hujūm-e-shauq-e-behad meñ

mirī āñkhoñ se hai ik ābshār-e-ārzū jaarī

ġhazab rañgīniyāñ thiiñ girya-hā-e-ibtidā.ī kī

huī hai jis se dāmān-e-mohabbat par ye gul-kārī

nahīñ khultī mirī nisbat tirī ai hīla-jū marzī

ki hai iqrār-e-dil-jūī na inkār-e-sitam-gārī

na kar itnā sitam ham dard-mandoñ par ki duniyā se

mabādā ik qalam uTh jaaye tahzīb-e-vafādārī

ravāñ hai qāfila sū-e-adam arbāb-e-mehnat kā

gayā pahle hī dil ab jān-e-maḳhzūñ kī hai tayyārī

ḳhushī se ḳhatm kar le saḳhtiyāñ qaid-e-farañg apnī

ki ham āzād haiñ begāna-e-ranj-e-dil-āzārī

na dekhe aur dil ushshāq par phir bhī nazar rakhe

qayāmat hai nigāh-e-yār kā husn-e-ḳhabardārī

yahī aalam rahā gar us ke husn-e-sehr-parvar kā

to baaqī rah chukī duniyā meñ rāh-o-rasm-e-hushiyārī

vo jurm-e-ārzū par jis qadar chāheñ sazā de leñ

mujhe ḳhud ḳhvāhish-e-ta.azīr hai mulzim huuñ iqrārī

chalā barsāt kā mausam na chhūTe qaid-e-ġham se ham

baḌī be-lutfiyoñ meñ ab kī guzrā vaqt-e-mai-ḳhvārī

'nasīm'-e-dehlavī ko vajd hai firdaus meñ 'hasrat'

jazāk-allāh terī shā.irī hai yā fusūñ-kārī

na ho us ki KHata-poshi pe kyun naz-e-gunah-gari

nishan-e-shan-e-rahmat bin gaya dagh-e-siyah-kari

sitam tum chhoD do main shikwa-sanji-ha-e-na-chaari

ki farz-e-ain hai kesh-e-mohabbat mein rawadari

wafa se dushmani rakh kar mere dil ki talabgari

bahut mushkil hai is jins-e-girami ki KHaridari

huin nakaamiyan bad-namiyan ruswaiyan kya kya

na chhuTi hum se lekin ku-e-jaanan ki hawadari

wo din ab yaad aate hain ki aaghaz-e-mohabbat mein

na chaalaki tujhe ai shoKH aati hai na ayyari

nahin gham jeb-o-daman ka magar han fikr hai itni

na uTThega mere dast-e-junun se ranj-e-bekari

na chhoDa marte dam tak sath bimar-e-mohabbat ka

qasam khane ke qabil hai tere gham ki wafadari

na un ko rahm aata hai na mujh se sabr hai mumkin

kahin aasan ho yarab mohabbat ki ye dushwari

wufur-e-ashk-e-paiham se hujum-e-shauq-e-behad mein

meri aankhon se hai ek aabshaar-e-arzu jari

ghazab ranginiyan thin girya-ha-e-ibtidai ki

hui hai jis se daman-e-mohabbat par ye gul-kari

nahin khulti meri nisbat teri ai hila-ju marzi

ki hai iqrar-e-dil-jui na inkar-e-sitam-gari

na kar itna sitam hum dard-mandon par ki duniya se

mabaada ek qalam uTh jaye tahzib-e-wafadari

rawan hai qafila su-e-adam arbab-e-mehnat ka

gaya pahle hi dil ab jaan-e-maKHzun ki hai tayyari

KHushi se KHatm kar le saKHtiyan qaid-e-farang apni

ki hum aazad hain begana-e-ranj-e-dil-azari

na dekhe aur dil ushshaq par phir bhi nazar rakhe

qayamat hai nigah-e-yar ka husn-e-KHabardari

yahi aalam raha gar us ke husn-e-sehr-parwar ka

to baqi rah chuki duniya mein rah-o-rasm-e-hushiyari

wo jurm-e-arzu par jis qadar chahen saza de len

mujhe KHud KHwahish-e-tazir hai mulzim hun iqrari

chala barsat ka mausam na chhuTe qaid-e-gham se hum

baDi be-lutfiyon mein ab ki guzra waqt-e-mai-KHwari

'nasim'-e-dehlawi ko wajd hai firdaus mein 'hasrat'

jazak-allah teri shairi hai ya fusun-kari