qawi dil shadman dil parsa dil

qavī dil shādmāñ dil pārsā dil

tire āshiq ne bhī paayā hai kyā dil

lagā do aag uzr-e-maslahat ko

ki hai bezār us shai se mirā dil

jafā-kārī hai taslīm-e-sitam bhī

na hogā tābe.a-e-jaur-o-jafā dil

ġhalat hai qaul-e-aql-e-maslahat-kosh

na us jānib karegā e'tinā dil

lagā kar aañkh us jān-e-jahāñ se

na hogā ab kisī se āshnā dil

miTe afkār-e-gonā-goñ ke jhagḌe

tire ġham ko na de kyūñkar duā dil

na pahuñchegī kabhī kyā gosh-e-gul tak

qafas se uḌ ke fariyād-e-anādil

tavānā-e-sadāqat hai to hargiz

na hogā pairav-e-bātil mirā dil

baḌī dargāh kā saa.il huuñ 'hasrat'

baḌī ummīd hai merī baḌā dil

qawi dil shadman dil parsa dil

tere aashiq ne bhi paya hai kya dil

laga do aag uzr-e-maslahat ko

ki hai bezar us shai se mera dil

jafa-kari hai taslim-e-sitam bhi

na hoga tabea-e-jaur-o-jafa dil

ghalat hai qaul-e-aql-e-maslahat-kosh

na us jaanib karega e'tina dil

laga kar aankh us jaan-e-jahan se

na hoga ab kisi se aashna dil

miTe afkar-e-gona-gon ke jhagDe

tere gham ko na de kyunkar dua dil

na pahunchegi kabhi kya gosh-e-gul tak

qafas se uD ke fariyaad-e-anadil

tawana-e-sadaqat hai to hargiz

na hoga pairaw-e-baatil mera dil

baDi dargah ka sail hun 'hasrat'

baDi ummid hai meri baDa dil