قوی دل شادماں دل پارسا دل

قوی دل شادماں دل پارسا دل

ترے عاشق نے بھی پایا ہے کیا دل

لگا دو آگ عذر مصلحت کو

کہ ہے بیزار اس شے سے مرا دل

جفا کاری ہے تسلیم ستم بھی

نہ ہوگا تابع جور و جفا دل

غلط ہے قول عقل مصلحت کوش

نہ اس جانب کرے گا اعتنا دل

لگا کر آنکھ اس جان جہاں سے

نہ ہوگا اب کسی سے آشنا دل

مٹے افکار گوناگوں کے جھگڑے

ترے غم کو نہ دے کیونکر دعا دل

نہ پہنچے گی کبھی کیا گوش گل تک

قفس سے اڑ کے فریاد عنادل

توانائے صداقت ہے تو ہرگز

نہ ہوگا پیرو باطل مرا دل

بڑی درگاہ کا سائل ہوں حسرتؔ

بڑی امید ہے میری بڑا دل