tumhaara naz farmana bura hai

tumhārā naaz farmānā burā hai

hamārā hosh meñ aanā burā hai

tirā har baat par ai hīla-parvar

mire sar kī qasam khānā burā hai

takalluf sab se kar ai jān-e-mahfil

mujhī se terā sharmānā burā hai

yahī kah do ki ab milnā na hogā

ye taḌpānā ye tarsānā burā hai

mirī har-dam kī betābī se jal kar

vo kahte haiñ ye dīvānā burā hai

mire dil se hai raazī ġham tumhārā

na kahnā ab ye kāshāna burā hai

yahī kah de na ik din ai sitamgar

tirī hājat kā barlānā burā hai

vahāñ bhī kyā nahīñ asnām-e-pindār

to kyuuñ masjid se but-ḳhāna burā hai

hare ho jā.eñge sab daaġh dil ke

tirā 'hasrat' udhar jaanā burā hai

tumhaara naz farmana bura hai

hamara hosh mein aana bura hai

tera har baat par ai hila-parwar

mere sar ki qasam khana bura hai

takalluf sab se kar ai jaan-e-mahfil

mujhi se tera sharmana bura hai

yahi kah do ki ab milna na hoga

ye taDpana ye tarsana bura hai

meri har-dam ki betabi se jal kar

wo kahte hain ye diwana bura hai

mere dil se hai raazi gham tumhaara

na kahna ab ye kashana bura hai

yahi kah de na ek din ai sitamgar

teri hajat ka barlana bura hai

wahan bhi kya nahin asnam-e-pindar

to kyun masjid se but-KHana bura hai

hare ho jaenge sab dagh dil ke

tera 'hasrat' udhar jaana bura hai