تمہارا ناز فرمانا برا ہے

تمہارا ناز فرمانا برا ہے

ہمارا ہوش میں آنا برا ہے

ترا ہر بات پر اے حیلہ پرور

مرے سر کی قسم کھانا برا ہے

تکلف سب سے کر اے جان محفل

مجھی سے تیرا شرمانا برا ہے

یہی کہہ دو کہ اب ملنا نہ ہوگا

یہ تڑپانا یہ ترسانا برا ہے

مری ہر دم کی بیتابی سے جل کر

وہ کہتے ہیں یہ دیوانا برا ہے

مرے دل سے ہے راضی غم تمہارا

نہ کہنا اب یہ کاشانہ برا ہے

یہی کہہ دے نہ اک دن اے ستم گر

تری حاجت کا برلانا برا ہے

وہاں بھی کیا نہیں اصنام پندار

تو کیوں مسجد سے بت خانہ برا ہے

ہرے ہو جائیں گے سب داغ دل کے

ترا حسرتؔ ادھر جانا برا ہے