thi rahat-e-hairat ki kis darja farawani

thī rāhat-e-hairat kī kis darja farāvānī

maiñ ne ġham-e-hastī kī sūrat bhī na pahchānī

ik maiñ huuñ so kyā maiñ huuñ mahrūm-e-farāġhat huuñ

ik dil hai so kyā dil hai majbūr-e-pareshānī

kis darja pashemāñ hai tāsīr-e-vafā merī

is shoḳh pe aatā hai ilzām-e-pashemānī

dekh ai sitam jānāñ ye naqsh-e-mohabbat haiñ

bante haiñ ba-dushvārī miTte haiñ ba-āsānī

maiñ us but-e-bad-ḳhū kī is aan par martā huuñ

khīñchā na kabhī us ne andoh-e-pashemānī

yaañ sabr meñ hai pinhāñ kaifiyat-e-betābī

vaañ lutf se paidā hai andāz-e-sitam-rānī

qaa.em hai tire dam se tarz-e-suḳhan qaa.em

phir varna kahāñ 'hasrat' ye rañg-e-ġhazal-ḳhvānī

thi rahat-e-hairat ki kis darja farawani

main ne gham-e-hasti ki surat bhi na pahchani

ek main hun so kya main hun mahrum-e-faraghat hun

ek dil hai so kya dil hai majbur-e-pareshani

kis darja pasheman hai tasir-e-wafa meri

is shoKH pe aata hai ilzam-e-pashemani

dekh ai sitam jaanan ye naqsh-e-mohabbat hain

bante hain ba-dushwari miTte hain ba-asani

main us but-e-bad-KHu ki is aan par marta hun

khincha na kabhi us ne andoh-e-pashemani

yan sabr mein hai pinhan kaifiyat-e-betabi

wan lutf se paida hai andaz-e-sitam-rani

qaem hai tere dam se tarz-e-suKHan qaem

phir warna kahan 'hasrat' ye rang-e-ghazal-KHwani