تھی راحت حیرت کی کس درجہ فراوانی

تھی راحت حیرت کی کس درجہ فراوانی

میں نے غم ہستی کی صورت بھی نہ پہچانی

اک میں ہوں سو کیا میں ہوں محروم فراغت ہوں

اک دل ہے سو کیا دل ہے مجبور پریشانی

کس درجہ پشیماں ہے تاثیر وفا میری

اس شوخ پہ آتا ہے الزام‌ پشیمانی

دیکھ اے ستم جاناں یہ نقش محبت ہیں

بنتے ہیں بہ دشواری مٹتے ہیں بہ آسانی

میں اس بت بد خو کی اس آن پر مرتا ہوں

کھینچا نہ کبھی اس نے اندوہ پشیمانی

یاں صبر میں ہے پنہاں کیفیت بیتابی

واں لطف سے پیدا ہے انداز ستم رانی

قائم ہے ترے دم سے طرز سخن قائم

پھر ورنہ کہاں حسرتؔ یہ رنگ غزل خوانی