shikan jab se dekhi hai unki jabin par

shikan jab se dekhī hai un kī jabīñ par

ajab sadma hai jān-e-andoh-gīñ par

na chhuTegī ab duḳht-e-zar ham se saaqī

kareñge amal terī raa.e zarrīñ par

ye jāneñ haiñ ushshāq kī yā hai afshāñ

paḌī hai jo is gesū-e-ambarīñ par

ajab us kī ḳhushbū hai kuchh rūh-parvar

vo koshish jo thī us tan-e-nāznīñ par

kuchh aa.ī to hai tark-e-mai par tabī.at

na machle jo rañgīnī-e-sātgīñ par

na kar nāsehā zabt-e-ġham kī nasīhat

ki hai sabr dushvār jān-e-hazīñ par

bahut ham ne DhūñDā magar misl terā

na paayā kahīñ aur rū-e-zamīñ par

mire girya-e-ḳhūñ kī sab lāla-kārī

numūdār hai dāman-e-āstīñ par

huī us meñ ik garmī-e-shauq paidā

paḌī jo nazar us ruḳh-e-ātishīñ par

tamāshā-e-ḳhūbāñ se itnā taġhāful

sad-afsos us zuhd-e-ḳhalvat-nashīñ par

nisār us pe 'hasrat' mirī jān-e-shīrīñ

tabassum jo hai us lab-e-shakkarīñ par

shikan jab se dekhi hai un ki jabin par

ajab sadma hai jaan-e-andoh-gin par

na chhuTegi ab duKHt-e-zar hum se saqi

karenge amal teri rae zarrin par

ye jaanen hain ushshaq ki ya hai afshan

paDi hai jo is gesu-e-ambarin par

ajab us ki KHushbu hai kuchh ruh-parwar

wo koshish jo thi us tan-e-naznin par

kuchh aai to hai tark-e-mai par tabiat

na machle jo rangini-e-satgin par

na kar naseha zabt-e-gham ki nasihat

ki hai sabr dushwar jaan-e-hazin par

bahut hum ne DhunDa magar misl tera

na paya kahin aur ru-e-zamin par

mere girya-e-KHun ki sab lala-kari

numudar hai daman-e-astin par

hui us mein ek garmi-e-shauq paida

paDi jo nazar us ruKH-e-atishin par

tamasha-e-KHuban se itna taghaful

sad-afsos us zuhd-e-KHalwat-nashin par

nisar us pe 'hasrat' meri jaan-e-shirin

tabassum jo hai us lab-e-shakkarin par