jafa ko wafa samjhen kab tak bhala hum

jafā ko vafā samjheñ kab tak bhalā ham

ab aise bhī un ke nahīñ mubtalā ham

ajab haiñ ye rāz-o-niyāz-e-mohabbat

ḳhafā kyuuñ hue vo haiñ is par ḳhafā ham

na shīrīn-o-lailā na farhād-o-majnūñ

zamāne meñ ab ek yā tum ho yā ham

ye kyā munsifī hai ki mahfil meñ terī

kisī kā bhī ho jurm paa.eñ sazā ham

tire jaur kā hai taqāza ki dekheñ

abhī kuchh dinoñ aur rāh-e-qazā ham

ġharīboñ se kahtī hai rahmat ye un kī

ki haiñ benavāoñ ke hājat-ravā ham

tirī raah meñ mar miTeñ bhī to kyā hai

fanā ho ke pā.eñge aish-e-baqā ham

tirī ḳhū-e-barham se vāqif thī phir bhī

hue muft sharminda-e-iltijā ham

amīrī meñ ho yā faqīrī meñ 'hasrat'

baharhāl DhūñDheñge un kī razā ham

jafa ko wafa samjhen kab tak bhala hum

ab aise bhi un ke nahin mubtala hum

ajab hain ye raaz-o-niyaz-e-mohabbat

KHafa kyun hue wo hain is par KHafa hum

na shirin-o-laila na farhad-o-majnun

zamane mein ab ek ya tum ho ya hum

ye kya munsifi hai ki mahfil mein teri

kisi ka bhi ho jurm paen saza hum

tere jaur ka hai taqaza ki dekhen

abhi kuchh dinon aur rah-e-qaza hum

gharibon se kahti hai rahmat ye un ki

ki hain benawaon ke hajat-rawa hum

teri rah mein mar miTen bhi to kya hai

fana ho ke paenge aish-e-baqa hum

teri KHu-e-barham se waqif thi phir bhi

hue muft sharminda-e-iltija hum

amiri mein ho ya faqiri mein 'hasrat'

baharhaal DhunDhenge un ki raza hum