hosh lazim hai ye majma aam hai

hosh lāzim hai ye majma.a aam hai

baam hai ai jalva-afgan baam hai

kyuuñ bayāñ kartā hai lazzāt-e-sahar

dekh ai rahrav abhī to shaam hai

ziist merī aur ye ayyām-e-firāq

ai ummīd-e-vasl terā kaam hai

ham ko nākām-e-mohabbat kyuuñ kaho

marg-e-nākāmī hamārā kaam hai

ab to aa jaao ki hai sub.h-e-firāq

ab to aa jaao ki merī shaam hai

shāhidoñ meñ bhī ishāre ham pe haiñ

āshiqoñ meñ bhī hamārā naam hai

parde vāloñ se taġhāful kā gila

kyuuñ karūñ jab lazzat-e-ālām hai

hādsāt-e-hijr meñ sar de diyā

vāqi.āt-e-dil kā sar-anjām hai

bismiloñ kā dil magar dekhā nahīñ

teġh ko kahte ho ḳhūñ-āshām hai

āshiqī aur aql kī pābandiyāñ

sach ye hai 'maikash' tumhārā kaam hai

hosh lazim hai ye majma aam hai

baam hai ai jalwa-afgan baam hai

kyun bayan karta hai lazzat-e-sahar

dekh ai rahraw abhi to sham hai

zist meri aur ye ayyam-e-firaq

ai ummid-e-wasl tera kaam hai

hum ko nakaam-e-mohabbat kyun kaho

marg-e-nakaami hamara kaam hai

ab to aa jao ki hai subh-e-firaq

ab to aa jao ki meri sham hai

shahidon mein bhi ishaare hum pe hain

aashiqon mein bhi hamara nam hai

parde walon se taghaful ka gila

kyun karun jab lazzat-e-alam hai

hadsat-e-hijr mein sar de diya

waqiat-e-dil ka sar-anjam hai

bismilon ka dil magar dekha nahin

tegh ko kahte ho KHun-asham hai

aashiqi aur aql ki pabandiyan

sach ye hai 'maikash' tumhaara kaam hai