tujhe saqi-e-pir-e-mughan ki qasam wo baada-e-nab pila de mujhe

tujhe sāqī-e-pīr-e-muġhāñ kī qasam vo bāda-e-nāb pilā de mujhe

jo āb-e-hayāt ko maat kare ḳhizr-e-rah-e-ishq banā de mujhe

kahtā huuñ ye un ke tasavvur se ai dushman-e-hastī-e-vahmī

jab Thahrā maiñ ik mauj-e-ravāñ ḳhat-e-mauj kī tarah miTā de mujhe

vo marīz huuñ maiñ ki masīh ne aa mirā bushra hī dekh javāb diyā

mire dard kī kyā ho un se davā is dukh se ḳhudā hī shifā de mujhe

dam-e-marg bhī us ko nahīñ dekhā sū-e-mulk-e-adam liye shauq chalā

kaash ab bhī vo aa ke kafan ko haTā apnā ruḳhsār dikhā de mujhe

tirī zulf-e-dotā hī vo dām-e-balā kisī tarh jo aa kar us meñ phañsā

na huā vo marne par bhī rihā vo hai kaun jo us se chhuḌā de mujhe

koī jā ke ye kah de tirā kushta sar-e-rāh hai kūcha meñ tere paḌā

de rahm jo us ke dil meñ ḳhudā vahī ḳhaak meñ aa ke milā de mujhe

mire haal par ab kar rahm ḳhudā tire haath meñ haiñ sab arz-o-samā

ye hai 'ājiz'-e-āsī kī tujh se duā ki tū jaldī us se milā de mujhe

tujhe saqi-e-pir-e-mughan ki qasam wo baada-e-nab pila de mujhe

jo aab-e-hayat ko mat kare KHizr-e-rah-e-ishq bana de mujhe

kahta hun ye un ke tasawwur se ai dushman-e-hasti-e-wahmi

jab Thahra main ek mauj-e-rawan KHat-e-mauj ki tarah miTa de mujhe

wo mariz hun main ki masih ne aa mera bushra hi dekh jawab diya

mere dard ki kya ho un se dawa is dukh se KHuda hi shifa de mujhe

dam-e-marg bhi us ko nahin dekha su-e-mulk-e-adam liye shauq chala

kash ab bhi wo aa ke kafan ko haTa apna ruKHsar dikha de mujhe

teri zulf-e-dota hi wo dam-e-bala kisi tarh jo aa kar us mein phansa

na hua wo marne par bhi riha wo hai kaun jo us se chhuDa de mujhe

koi ja ke ye kah de tera kushta sar-e-rah hai kucha mein tere paDa

de rahm jo us ke dil mein KHuda wahi KHak mein aa ke mila de mujhe

mere haal par ab kar rahm KHuda tere hath mein hain sab arz-o-sama

ye hai 'ajiz'-e-asi ki tujh se dua ki tu jaldi us se mila de mujhe