khinche aate hain zahid masjidon se su-e-mai-KHana

khiñche aate haiñ zāhid masjidoñ se sū-e-mai-ḳhāna

kisī kī chashm-e-maigūñ kā rahe gardish meñ paimāna

tu apne ishq meñ aisā banā de mujh ko dīvāna

ki ābādī se vahshat ho karūñ ābād vīrāna

murīd-e-pīr-e-mai-ḳhāna hue qismat se ai nāseh

na jhāḌeñ shauq meñ palkoñ se ham kyuuñ sahn-e-mai-ḳhāna

jahān-e-be-ḳhudī meñ mastī-e-vahdat jo le jaaye

farishte leñ qadam mere vo huuñ maiñ riñd-e-mastāna

sunā hai maiñ ne ġhavvāsāne-dariyā-e-haqīqat se

vo hai bahr-e-do-ālam meñ durr-e-makūn-e-yak-dāna

janāb-e-ishq kī chashm-e-ināyat ne jise taakā

huā mard-e-yagāna chhūTe us se ḳhvesh-o-begāna

nazar aa.e jo ik jalva tirā dair-e-barahman meñ

to TuuTe shaiḳh kā taqvā ki qibla ho sanam-ḳhāna

qabā-e-zindagī hī tañg hai jab jism-e-insāñ par

to phir kyā fā.eda rakhne se sar par tāj-e-shāhāna

phañse haiñ qudsiyoñ ke dil rihā.ī ho nahīñ saktī

ki dām-e-zulf un ko ho gayā zanjīr kā daana

sarāpā de ke 'ājiz' naam karnā ishq-bāzoñ meñ

ki marne par tirā baaqī rahe duniyā meñ afsāna

khinche aate hain zahid masjidon se su-e-mai-KHana

kisi ki chashm-e-maigun ka rahe gardish mein paimana

tu apne ishq mein aisa bana de mujh ko diwana

ki aabaadi se wahshat ho karun aabaad virana

murid-e-pir-e-mai-KHana hue qismat se ai naseh

na jhaDen shauq mein palkon se hum kyun sahn-e-mai-KHana

jahan-e-be-KHudi mein masti-e-wahdat jo le jaye

farishte len qadam mere wo hun main rind-e-mastana

suna hai main ne ghawwasane-dariya-e-haqiqat se

wo hai bahr-e-do-alam mein durr-e-makun-e-yak-dana

janab-e-ishq ki chashm-e-inayat ne jise taka

hua mard-e-yagana chhuTe us se KHwesh-o-begana

nazar aae jo ek jalwa tera dair-e-barahman mein

to TuTe shaiKH ka taqwa ki qibla ho sanam-KHana

qaba-e-zindagi hi tang hai jab jism-e-insan par

to phir kya faeda rakhne se sar par taj-e-shahana

phanse hain qudsiyon ke dil rihai ho nahin sakti

ki dam-e-zulf un ko ho gaya zanjir ka dana

sarapa de ke 'ajiz' nam karna ishq-bazon mein

ki marne par tera baqi rahe duniya mein afsana