dil hai wahi dil jis mein bhara nur-e-KHuda ho

dil hai vahī dil jis meñ bharā nūr-e-ḳhudā ho

sar hai vahī jo ka.aba-e-taslīm-o-razā ho

ai sarv-ḳhirāmāñ batā de mujhe kyā ho

raftār se terī jo qayāmat na bapā ho

bīmār-e-mohabbat kī agar laakh davā ho

mumkin hī nahīñ ye ki masīhā se shifā ho

bīmār-e-tap-e-ishq huuñ kab mujh ko shifā ho

juz vasl agar laakh davā aur duā ho

vallāh ki tum husn meñ yūsuf se sivā ho

hai chaah tumhārī mujhe par tum jise chāho

kyā manzil-e-maqsūd kī duurī ko batā.e

jo ḳhasta rah-e-ishq meñ ho ābla-pā ho

ġhairoñ meñ na maiñ arz-e-tamannā se rukuñgā

iġhmāz kare vo sar-e-mahfil ki ḳhafā ho

'ājiz' hai abas fikr-e-ma.īshat meñ pareshāñ

hogā vahī āḳhir jo muqaddar meñ likhā ho

pahuñchā de pas-e-marg merī ḳhaak uḌā kar

kūcha meñ jo us ke guzar ai bād-e-sabā ho

dil hai wahi dil jis mein bhara nur-e-KHuda ho

sar hai wahi jo kaba-e-taslim-o-raza ho

ai sarw-KHiraman bata de mujhe kya ho

raftar se teri jo qayamat na bapa ho

bimar-e-mohabbat ki agar lakh dawa ho

mumkin hi nahin ye ki masiha se shifa ho

bimar-e-tap-e-ishq hun kab mujh ko shifa ho

juz wasl agar lakh dawa aur dua ho

wallah ki tum husn mein yusuf se siwa ho

hai chah tumhaari mujhe par tum jise chaho

kya manzil-e-maqsud ki duri ko batae

jo KHasta rah-e-ishq mein ho aabla-pa ho

ghairon mein na main arz-e-tamanna se rukunga

ighmaz kare wo sar-e-mahfil ki KHafa ho

'ajiz' hai abas fikr-e-maishat mein pareshan

hoga wahi aaKHir jo muqaddar mein likha ho

pahuncha de pas-e-marg meri KHak uDa kar

kucha mein jo us ke guzar ai baad-e-saba ho