na kare zabt agar dida-e-giryan paida

na kare zabt agar dīda-e-giryāñ paidā

bārish-e-ashk se ho nuuh kā tūfāñ paidā

aa ke duniyā meñ sabhī karte haiñ sāmāñ paidā

le ke jaate haiñ kafan hote haiñ uryāñ paidā

karte haiñ shikva tirā gabr-o-musalmāñ donoñ

koī tujh sā nahīñ ġhārat-gar-e-īmāñ paidā

ruḳh-e-mahbūb kā ho dhyān jo tere dil meñ

ho garebāñ hī meñ tere gulistāñ paidā

ḳhalq ko chaah na hotī kabhī tere hote

is zamāna meñ jo hote mah-e-kan.āñ paidā

kis tarah arsh se mazmūn suḳhan-var laa.e

fikr-e-duniyā se to he tab.a meñ ḳhaljāñ paidā

aa ke is ġham-kada meñ rote haiñ sab ai 'ājiz'

hote dekhā hai kahīñ tifl ko ḳhandāñ paidā

na kare zabt agar dida-e-giryan paida

barish-e-ashk se ho nuh ka tufan paida

aa ke duniya mein sabhi karte hain saman paida

le ke jate hain kafan hote hain uryan paida

karte hain shikwa tera gabr-o-musalman donon

koi tujh sa nahin ghaarat-gar-e-iman paida

ruKH-e-mahbub ka ho dhyan jo tere dil mein

ho gareban hi mein tere gulistan paida

KHalq ko chah na hoti kabhī tere hote

is zamana mein jo hote mah-e-kanan paida

kis tarah arsh se mazmun suKHan-war lae

fikr-e-duniya se to he taba mein KHaljaan paida

aa ke is gham-kada mein rote hain sab ai 'ajiz'

hote dekha hai kahin tifl ko KHandan paida