ganj-e-qarun ko karen KHak-barabar na shumar

ganj-e-qārūñ ko kareñ ḳhāk-barābar na shumār

āshiqoñ ke liye iksīr hai ḳhāk-e-dayār

roz-e-raushan na ho kyuuñ vasl meñ shab-e-tār

aap kā rū-e-kitābī to hai nūr-ul-anvār

varaq-e-barg-e-saman par qalam-e-nargis se

naama us gul ko jo likkhūñ to baḳht-e-gulzār

naaz iisā ko hai apnī masīhā.ī par

un se achchhā na huā koī tumhārā bīmār

dil-e-sad-chāk se aa.ī ye sadā kānoñ meñ

rah tū sargarm-e-talab raah meñ himmat ko na haar

iid se bhī kahīñ baḌh kar hai ḳhushī aalam meñ

jab se mash.hūr huī hai ḳhabar-e-āmad-e-yār

aane do vasl kī shab ḳhuub maze lūTeñge

ab kī hogā nahīñ us se faqat bos-o-kanār

ḳhat-e-tovām kī tarah un se lipaT jā.eñge

ham na māneñge kabhī laakh kareñ vo inkār

maskan-e-'ājiz'-e-miskīñ hai 'barāhīm'-maqām

ka.aba kī tarah ziyārat kareñ aa kar zavvār

ganj-e-qarun ko karen KHak-barabar na shumar

aashiqon ke liye iksir hai KHak-e-dayar

roz-e-raushan na ho kyun wasl mein shab-e-tar

aap ka ru-e-kitabi to hai nur-ul-anwar

waraq-e-barg-e-saman par qalam-e-nargis se

nama us gul ko jo likkhun to baKHt-e-gulzar

naz isa ko hai apnī masihai par

un se achchha na hua koi tumhaara bimar

dil-e-sad-chaak se aai ye sada kanon mein

rah tu sargarm-e-talab rah mein himmat ko na haar

id se bhi kahin baDh kar hai KHushi aalam mein

jab se mashhur hui hai KHabar-e-amad-e-yar

aane do wasl ki shab KHub maze luTenge

ab ki hoga nahin us se faqat bos-o-kanar

KHat-e-towam ki tarah un se lipaT jaenge

hum na manenge kabhī lakh karen wo inkar

maskan-e-'ajiz'-e-miskin hai 'barahim'-maqam

kaba ki tarah ziyarat karen aa kar zawwar