miyan sang-o-aina dalil-e-motabar rakh di

miyāñ sañg-o-ā.īna dalīl-e-mo'tabar rakh dī

kahīñ dil rakh diyā apnā kahīñ apnī nazar rakh dī

añdheroñ ne shikast-e-fāsh de dī hai ujāloñ ko

jabīn-e-lauh par ye vaqt ne kaisī ḳhabar rakh dī

makān-o-lā-makāñ ik lafz-e-kun kī kārsāzī haiñ

usī ik lafz ne goyā banā-e-kHair-o-shar rakh dī

junūn-e-shauq merā le to aayā mujh ko manzil tak

magar taqdīr ne dāman meñ kuchh gard-e-safar rakh dī

safar se lauT kar aayā to kuchh aisā lagā mujh ko

mere qadmoñ ke nīche phir kisī ne rahguzar rakh dī

mirī vīrāniyoñ ko jis ke jalvoñ kā sahārā thā

havāoñ ne vo ik tasavvur gul bhī phaaḌ kar rakh dī

ba-qadr-e-hosh ai ‘qaisar’ bas itnā yaad hai mujh ko

mirī nazroñ ne koī shai uThā kar taaq par rakh dī

miyan sang-o-aina dalil-e-mo'tabar rakh di

kahin dil rakh diya apna kahin apni nazar rakh di

andheron ne shikast-e-fash de di hai ujalon ko

jabin-e-lauh par ye waqt ne kaisi KHabar rakh di

makan-o-la-makan ek lafz-e-kun ki karsazi hain

usi ek lafz ne goya bana-e-kHair-o-shar rakh di

junun-e-shauq mera le to aaya mujh ko manzil tak

magar taqdir ne daman mein kuchh gard-e-safar rakh di

safar se lauT kar aaya to kuchh aisa laga mujh ko

mere qadmon ke niche phir kisi ne rahguzar rakh di

meri viraniyon ko jis ke jalwon ka sahaara tha

hawaon ne wo ek tasawwur gul bhi phaD kar rakh di

ba-qadr-e-hosh ai ‘qaisar’ bas itna yaad hai mujh ko

meri nazron ne koi shai uTha kar taq par rakh di