ek jahan diwana us zulf dota ka ho gaya

ik jahāñ dīvāna us zulf dotā kā ho gyā

ibtidā hī meñ ye saudā intihā kā ho gayā

aap ko khoyā magar juuyā ḳhudā kā ho gayā

raaz jis par munkashif fikr-o-fanā kā ho gayā

ham ko bhī āḳhir huzūr-e-qalb hove gā kabhī

arz kar leñge jo mauqa iltijā kā ho gayā

haa.il nazzāra-e-dīdār kyā ho gī naqāb

duur parda jis ghaḌī sharm-o-hayā kā ho gayā

marte haiñ bīmār-e-ulfat muttasil ab ai masīh

band darvāza magar dārushshifā kā ho gayā

us nigāh-e-tez se dil ho gayā jis dam do-chār

maiñ ne jaanā sāmnā tīr-e-qazā kā ho gayā

huur ke ġhamze use jannat meñ ḳhush aate nahii.

ai parī-rū kushta jo terī adā kā ho gayā

yaad meñ us raast qāmat ke jo kī faryād 'rind'

maah qad baalā alif āḳhir nidā kā ho gayā

ek jahan diwana us zulf dota ka ho gya

ibtida hi mein ye sauda intiha ka ho gaya

aap ko khoya magar juya KHuda ka ho gaya

raaz jis par munkashif fikr-o-fana ka ho gaya

hum ko bhi aaKHir huzur-e-qalb howe ga kabhi

arz kar lenge jo mauqa iltija ka ho gaya

hail nazzara-e-didar kya ho gi naqab

dur parda jis ghaDi sharm-o-haya ka ho gaya

marte hain bimar-e-ulfat muttasil ab ai masih

band darwaza magar darushshifa ka ho gaya

us nigah-e-tez se dil ho gaya jis dam do-chaar

main ne jaana samna tir-e-qaza ka ho gaya

hur ke ghamze use jannat mein KHush aate nahi

ai pari-ru kushta jo teri ada ka ho gaya

yaad mein us rast qamat ke jo ki faryaad 'rind'

mah qad baala alif aaKHir nida ka ho gaya