اک جہاں دیوانہ اس زلف دوتا کا ہو گیا

اک جہاں دیوانہ اس زلف دوتا کا ہو گیا

ابتدا ہی میں یہ سودا انتہا کا ہو گیا

آپ کو کھویا مگر جویا خدا کا ہو گیا

راز جس پر منکشف فقر و فنا کا ہو گیا

ہم کو بھی آخر حضور قلب ہووے گا کبھی

عرض کر لیں گے جو موقع التجا کا ہو گیا

حائل نظارۂ دیدار کیا ہو گی نقاب

دور پردہ جس گھڑی شرم و حیا کا ہو گیا

مرتے ہیں بیمار‌ الفت متصل اب اے مسیح

بند دروازہ مگر دار الشفا کا ہو گیا

اس نگاہ تیز سے دل ہو گیا جس دم دو چار

میں نے جانا سامنا تیر قضا کا ہو گیا

حور کے غمزے اسے جنت میں خوش آتے نہیں

اے پری رو کشتہ جو تیری ادا کا ہو گیا

یاد میں اس راست قامت کے جو کی فریاد رندؔ

ماہ قد بالا الف آخر ندا کا ہو گیا