ek pal wo nigahen bhi churaen to ajab kya

ik pal vo nigāheñ bhī churā.eñ to 'ajab kyā

chup chaap mujhe dil meñ basā.eñ to 'ajab kyā

ik mushk bharī saañs ho ḳham gesū kī mānind

girdāb meñ ḳhushbū kī bahā.eñ to 'ajab kyā

jab ḳhum se nikaltī hai hañsī saaz kī sūrat

vo qahqaha-e-jāñ ko sunā.eñ to 'ajab kyā

palkoñ pe ho shabnam ho tabassum meñ sharārat

sarmast nigāhoñ se pilā.eñ to 'ajab kyā

lab jaise gulāboñ pe ho bārish kī sadā sī

us lab kī harārat meñ jalā.eñ to ajab kyā

ik ḳhaal ho nāf-e-zar-e-ḳhum par jo mahak sā

vo rāz-e-badan ḳhud hī batā.eñ to 'ajab kyā

jab naqsh-e-badan shauq meñ aa jaa.e numāyāñ

saaya sā bhī parde se haTā.eñ to 'ajab kyā

'itrān-e-ruḳh-e-yār se jab sub.h mahak jaa.e

sabza bhī ruḳh-e-anvar ko paa.eñ to 'ajab kyā

kānoñ meñ vo baalī ho vo sadafoñ kī chamak ho

guftār se āvāz bahā.eñ to 'ajab kyā

mizhgān kī nokoñ se ho tauqīr kī bārish

ik pal meñ nigāheñ bhī jhukā.eñ to 'ajab kyā

chāheñ to ishāroñ se badal deñ mire mausam

ik pal meñ vo sahrāoñ ko chhā.eñ to 'ajab kyā

'naushā' ye tirī 'arz-e-tamannā hī bahut hai

phir husn bhī parde ko haTā.eñ to 'ajab kyā

ek pal wo nigahen bhi churaen to 'ajab kya

chup chap mujhe dil mein basaen to 'ajab kya

ek mushk bhari sans ho KHam gesu ki manind

girdab mein KHushbu ki bahaen to 'ajab kya

jab KHum se nikalti hai hansi saz ki surat

wo qahqaha-e-jaan ko sunaen to 'ajab kya

palkon pe ho shabnam ho tabassum mein shararat

sarmast nigahon se pilaen to 'ajab kya

lab jaise gulabon pe ho barish ki sada si

us lab ki hararat mein jalaen to ajab kya

ek KHal ho naf-e-zar-e-KHum par jo mahak sa

wo raaz-e-badan KHud hi bataen to 'ajab kya

jab naqsh-e-badan shauq mein aa jae numayan

saya sa bhi parde se haTaen to 'ajab kya

'itran-e-ruKH-e-yar se jab subh mahak jae

sabza bhi ruKH-e-anwar ko paen to 'ajab kya

kanon mein wo baali ho wo sadafon ki chamak ho

guftar se aawaz bahaen to 'ajab kya

mizhgan ki nokon se ho tauqir ki barish

ek pal mein nigahen bhi jhukaen to 'ajab kya

chahen to ishaaron se badal den mere mausam

ek pal mein wo sahraon ko chhaen to 'ajab kya

'nausha' ye teri 'arz-e-tamanna hi bahut hai

phir husn bhi parde ko haTaen to 'ajab kya