yar tha mujh mein ayan ye mujhe malum na tha

yaar thā mujh meñ 'ayāñ ye mujhe mā'lūm na thā

thā sarāpā maiñ nihāñ ye mujhe mā'lūm na thā

haram-o-dair meñ thā zāt-e-mubārak kā zuhūr

thā vahī jalva-kunāñ ye mujhe mā'lūm na thā

tū hī bā'is huā mansūr ke haq kahne kā

tū hī thā us kī zabāñ ye mujhe mā'lūm na thā

maiñ na thā yaar thā aur yaar kā jalva maiñ thā

thā 'abas vahm-o-gumāñ ye mujhe mā'lūm na thā

kho gayā maiñ to milā us kā pata apne meñ

be-nishānī thī nishāñ ye mujhe mā'lūm na thā

masjid-o-dair meñ kyuuñ dil ke sivā kī thī talāsh

thā vo mā'shūq yahāñ ye mujhe mā'lūm na thā

jā ke kā'ba ko thakā DhūñD chukā mandir meñ

thā baġhal meñ vo nihāñ ye mujhe mā'lūm na thā

'vāqif' us vādī-e-hastī meñ mujhe laayā kyuuñ

ḳhuld thā merā makāñ ye mujhe mā'lūm na thā

yar tha mujh mein 'ayan ye mujhe ma'lum na tha

tha sarapa main nihan ye mujhe ma'lum na tha

haram-o-dair mein tha zat-e-mubarak ka zuhur

tha wahi jalwa-kunan ye mujhe ma'lum na tha

tu hi ba'is hua mansur ke haq kahne ka

tu hi tha us ki zaban ye mujhe ma'lum na tha

main na tha yar tha aur yar ka jalwa main tha

tha 'abas wahm-o-guman ye mujhe ma'lum na tha

kho gaya main to mila us ka pata apne mein

be-nishani thi nishan ye mujhe ma'lum na tha

masjid-o-dair mein kyun dil ke siwa ki thi talash

tha wo ma'shuq yahan ye mujhe ma'lum na tha

ja ke ka'ba ko thaka DhunD chuka mandir mein

tha baghal mein wo nihan ye mujhe ma'lum na tha

'waqif' us wadi-e-hasti mein mujhe laya kyun

KHuld tha mera makan ye mujhe ma'lum na tha