mujhko apne ishq mein ruswa kiya

mujh ko apne 'ishq meñ rusvā kiyā

jo kiyā tuune bahut achchhā kiyā

kyā dikhāyā qadd-e-mauzūñ aap ne

sarv ko gulzār meñ sīdhā kiyā

be-hijābāna rahe tum ġhair se

apne mahram se magar pardā kiyā

ro diyā mahfil meñ un ko dekh kar

merī āñkhoñ ne mujhe rusvā kiyā

jalva-ārā sūrat-e-ādam meñ thā

sab farishtoñ ne tujhe sajda kiyā

hai sitam terā karam mere liye

maiñ ne kab is baat kā shikvā kiyā

ho gayā 'vāqif' halāk-e-teġh-e-nāz

āshnā kaisā thā tum ne kyā kiyā

mujh ko apne 'ishq mein ruswa kiya

jo kiya tune bahut achchha kiya

kya dikhaya qadd-e-mauzun aap ne

sarw ko gulzar mein sidha kiya

be-hijabana rahe tum ghair se

apne mahram se magar parda kiya

ro diya mahfil mein un ko dekh kar

meri aankhon ne mujhe ruswa kiya

jalwa-ara surat-e-adam mein tha

sab farishton ne tujhe sajda kiya

hai sitam tera karam mere liye

main ne kab is baat ka shikwa kiya

ho gaya 'waqif' halak-e-tegh-e-naz

aashna kaisa tha tum ne kya kiya