hai jo dil mein ek yagane ka KHayal

hai jo dil meñ ik yagāne kā ḳhayāl

miT gayā saare zamāne kā ḳhayāl

ek shab vo aa to jaa.eñ ḳhvāb meñ

paañv par hai sar jhukāne kā ḳhayāl

rahne diije apnī kūcha meñ kahīñ

chāhiye mujh be-Thikāne kā ḳhayāl

apne dam ko tū ġhanīmat jaan le

rakh nafas ke aane jaane kā ḳhayāl

lan-tarānī vo sunāte haiñ mujhe

hai jo dar-parda jalāne kā ḳhayāl

jān-o-dil donoñ nisār un par karūñ

hai agar ghar mere aane kā ḳhayāl

hai tasavvur kūcha-e-mā'shūq kā

mujh ko hai jannat meñ jaane kā ḳhayāl

vo bulā le paas agar 'vāqif' mujhe

qissa-e-dil hai sunāne kā ḳhayāl

hai jo dil mein ek yagane ka KHayal

miT gaya sare zamane ka KHayal

ek shab wo aa to jaen KHwab mein

panw par hai sar jhukane ka KHayal

rahne dije apni kucha mein kahin

chahiye mujh be-Thikane ka KHayal

apne dam ko tu ghanimat jaan le

rakh nafas ke aane jaane ka KHayal

lan-tarani wo sunate hain mujhe

hai jo dar-parda jalane ka KHayal

jaan-o-dil donon nisar un par karun

hai agar ghar mere aane ka KHayal

hai tasawwur kucha-e-ma'shuq ka

mujh ko hai jannat mein jaane ka KHayal

wo bula le pas agar 'waqif' mujhe

qissa-e-dil hai sunane ka KHayal