jaan-e-jaan-e-ashiqan dekha tumhein

jān-e-jān-e-'āshiqāñ dekhā tumheñ

marham-e-zaḳhm-e-nihāñ dekhā tumheñ

hai tumhārā har jagah nūr-o-zuhūr

kyā batā.ūñ maiñ kahāñ dekhā tumheñ

maar Daalā aur zinda bhī kiyā

mehrbāñ nā-mehrbāñ dekhā tumheñ

tum ko paayā ham ne sultān-e-'arab

dilbar-e-hindostāñ dekhā tumheñ

sauma’a meñ mai-kade meñ dair meñ

ik tumhīñ nikle jahāñ dekhā tumheñ

aa.ī bairañgī tumhāre rañg meñ

sad-bahār-e-gulsitāñ dekhā tumheñ

hai tumhīñ se jumla ashiyā kā vajūd

sab meñ paidā vo nihāñ dekhā tumheñ

jo tumhāre raaz se 'vāqif' huā

har kisī meñ be-gumāñ dekhā tumheñ

jaan-e-jaan-e-'ashiqan dekha tumhein

marham-e-zaKHm-e-nihan dekha tumhein

hai tumhaara har jagah nur-o-zuhur

kya bataun main kahan dekha tumhein

mar Dala aur zinda bhi kiya

mehrban na-mehrban dekha tumhein

tum ko paya hum ne sultan-e-'arab

dilbar-e-hindostan dekha tumhein

sauma’a mein mai-kade mein dair mein

ek tumhin nikle jahan dekha tumhein

aai bairangi tumhaare rang mein

sad-bahaar-e-gulsitan dekha tumhein

hai tumhin se jumla ashiya ka wajud

sab mein paida wo nihan dekha tumhein

jo tumhaare raaz se 'waqif' hua

har kisi mein be-guman dekha tumhein