har jagah hun kahan nahin hun main

har jagah huuñ kahāñ nahīñ huuñ maiñ

jalva-gar huuñ nihāñ nahīñ huuñ maiñ

be-kam-o-kaif zaat merī hai

par chunīn-o-chunāñ nahīñ huuñ maiñ

har jagah mānte haiñ sab mujh ko

ḳhud yaqīñ huuñ gumāñ nahīñ huuñ maiñ

maiñ huuñ had-e-quyūd se bāhar

lā-makāñ huuñ makāñ nahīñ huuñ maiñ

muzmahil mere sāmne hai sab

be-nishāñ huuñ nishāñ nahīñ huuñ maiñ

dair-o-kā'ba mujhī se raushan hai

kyā yahāñ kyā vahāñ nahīñ huuñ maiñ

hai yahī baat dhyān maiñ 'vāqif'

vahī sab kuchh haañ nahīñ huuñ maiñ

har jagah hun kahan nahin hun main

jalwa-gar hun nihan nahin hun main

be-kam-o-kaif zat meri hai

par chunin-o-chunan nahin hun main

har jagah mante hain sab mujh ko

KHud yaqin hun guman nahin hun main

main hun had-e-quyud se bahar

la-makan hun makan nahin hun main

muzmahil mere samne hai sab

be-nishan hun nishan nahin hun main

dair-o-ka'ba mujhi se raushan hai

kya yahan kya wahan nahin hun main

hai yahi baat dhyan main 'waqif'

wahi sab kuchh han nahin hun main