wahi har-ja bahaar-e-gulistan hai

vahī har-jā bahār-e-gulistāñ hai

'ayāñ hai rañg meñ bū meñ nihāñ hai

zuhūr-e-shakHs-o-nūr-e-'aks hai ek

bashar ā.īna ban kar darmiyāñ hai

usī se hai hayāt-e-jumla-ashyā

jise dekhā nishān-e-be-nishāñ hai

vahī sāġhar vahī miinā vahī ḳhum

vahī mai-kash vahī pīr-e-muġhāñ hai

use kahte haiñ sab 'anqā-e-maġhrib

hamesha lā-makāñ meñ āshiyāñ hai

ishāra aañkh kī hai putliyoñ kā

ki vo nūr-e-nazar merā yahāñ hai

vahī goyā vahī suntā hai 'vāqif'

tamāshā hai ki be-gosh-o-zabāñ hai

wahi har-ja bahaar-e-gulistan hai

'ayan hai rang mein bu mein nihan hai

zuhur-e-shakHs-o-nur-e-'aks hai ek

bashar aaina ban kar darmiyan hai

usi se hai hayat-e-jumla-ashya

jise dekha nishan-e-be-nishan hai

wahi saghar wahi mina wahi KHum

wahi mai-kash wahi pir-e-mughan hai

use kahte hain sab 'anqa-e-maghrib

hamesha la-makan mein aashiyan hai

ishaara aankh ki hai putliyon ka

ki wo nur-e-nazar mera yahan hai

wahi goya wahi sunta hai 'waqif'

tamasha hai ki be-gosh-o-zaban hai