in pe rashk aata hai ye log hain qismat wale

in pe rashk aatā hai ye log haiñ qismat vaale

raah meñ terī miTe terī mohabbat vaale

tere hī ġham meñ mare terī mohabbat vaale

paak dil le ke ga.e paak tabī.at vaale

khā lete haiñ abas jaan nasīhat vaale

ishq se baaz na ā.eñge mohabbat vaale

us ke saudā.iyoñ ko nām-o-nishāñ se matlab

be-nishāñ log haiñ ye ishq-o-mohabbat vaale

manzil-e-ishq meñ aate hī hue ḳhāk-basar

miT ga.e miTne se pahle hī mohabbat vaale

aa gayā baar nazar se araq un gāloñ par

ye haiñ vo ham jinheñ kahte haiñ nazākat vaale

na hameñ shāhoñ se matlab na amīroñ se ġharaz

ham hasīnoñ ke haiñ bande ye haiñ daulat vaale

daar par chaḌh ke bhī mansūr kī mastī na ga.ī

kalima paḌhte haiñ is mast kā sab matvāle

tere qāmat pe hai zebā vahī atlas kī qabā

apnī sūrat na badal chāñd sī sūrat vaale

vo jidhar jaatā hai chillātī hai yuuñ ḳhalq-e-ḳhudā

dekhtā jā idhar au chāñd sī sūrat vaale

ye mere urs kī shab hai ke urūsī kī hai raat

haiñ hasīnān-e-gul-andām ziyārat vaale

yā ḳhudā vasl kabhī hogā nasīb us but kā

ham se kam-baḳht bhī kahlā.eñge qismat vaale

mere ghar aayā jo vo mahr-e-munīr ai 'akbar'

mujh se kahtā hai ke ab to hue qismat vaale

in pe rashk aata hai ye log hain qismat wale

rah mein teri miTe teri mohabbat wale

tere hi gham mein mare teri mohabbat wale

pak dil le ke gae pak tabiat wale

kha lete hain abas jaan nasihat wale

ishq se baz na aaenge mohabbat wale

us ke saudaiyon ko nam-o-nishan se matlab

be-nishan log hain ye ishq-o-mohabbat wale

manzil-e-ishq mein aate hi hue KHak-basar

miT gae miTne se pahle hi mohabbat wale

aa gaya bar nazar se araq un galon par

ye hain wo hum jinhen kahte hain nazakat wale

na hamein shahon se matlab na amiron se gharaz

hum hasinon ke hain bande ye hain daulat wale

dar par chaDh ke bhi mansur ki masti na gai

kalima paDhte hain is mast ka sab matwale

tere qamat pe hai zeba wahi atlas ki qaba

apni surat na badal chand si surat wale

wo jidhar jata hai chillati hai yun KHalq-e-KHuda

dekhta ja idhar au chand si surat wale

ye mere urs ki shab hai ke urusi ki hai raat

hain hasinan-e-gul-andam ziyarat wale

ya KHuda wasl kabhi hoga nasib us but ka

hum se kam-baKHt bhi kahlaenge qismat wale

mere ghar aaya jo wo mahr-e-munir ai 'akbar'

mujh se kahta hai ke ab to hue qismat wale