apne shaidai ki wo KHub KHabar rakhte hain

apne shaidā.ī kī vo ḳhuub ḳhabar rakhte haiñ

ḳhud nazar aate nahīñ sab pe nazar rakhte haiñ

laakh rusvā kare ham ko ye zamāna lekin

ham nigāhoñ meñ sadā aap kā dar rakhte haiñ

ittifāq us ko kaheñ yā ki muqaddar apnā

husn tum rakhte ho ham husn-e-nazar rakhte haiñ

māñgne kā nahīñ aatā hai salīqa ham ko

vo navāzish kā magar ḳhuub hunar rakhte haiñ

ḳhud taḌap jaate haiñ vo dekh ke mujh ko muztar

mom jaisā mire sarkār jigar rakhte haiñ

husn-e-iqbāl faqat un ko nazar aatā hai

dekhne vaale agar husn-e-nazar rakhte haiñ

apne shaidai ki wo KHub KHabar rakhte hain

KHud nazar aate nahin sab pe nazar rakhte hain

lakh ruswa kare hum ko ye zamana lekin

hum nigahon mein sada aap ka dar rakhte hain

ittifaq us ko kahen ya ki muqaddar apna

husn tum rakhte ho hum husn-e-nazar rakhte hain

mangne ka nahin aata hai saliqa hum ko

wo nawazish ka magar KHub hunar rakhte hain

KHud taDap jate hain wo dekh ke mujh ko muztar

mom jaisa mere sarkar jigar rakhte hain

husn-e-iqbaal faqat un ko nazar aata hai

dekhne wale agar husn-e-nazar rakhte hain