is tarh junun ki duniya mein jine ka sahaara karte hain

is tarh junūñ kī duniyā meñ jiine kā sahārā karte haiñ

dāman ke pareshāñ tāroñ ko ham pārā-pārā karte haiñ

bijlī ko adāvat ho jin se gulchīñ kī nazar ho jin pe kaḌī

vo phuul hamesha kāñToñ ke pahlū meñ guzārā karte haiñ

ik vo bhī zamāna thā apnā maiñ un kā nazāra kartā thā

ik ye bhī zamāna hai apnā vo merā nazārā karte haiñ

rañgīnī-e-duniyā ke ma.anī samjhe haiñ vahī kuchh ahl-e-junūñ

jo ġhuncha-o-gul ko Thukrā kar kāñToñ pe guzārā karte haiñ

tū aur zarā mohkam kar le pardoñ kī mukammal bandish ko

ai dost nazar kī garmī ko ham aaj sharārā karte haiñ

maiñ un kā azal se qaa.il huuñ maiñ un pe azal se maa.il huuñ

jo sirf nazar kī jumbish se bīmār kā chārā karte haiñ

sāġhar se unheñ ab kyā nisbat miinā se unheñ ab kyā matlab

din-rāt 'azīz' in āñkhoñ se jo dil meñ utārā karte haiñ

is tarh junun ki duniya mein jine ka sahaara karte hain

daman ke pareshan taron ko hum para-para karte hain

bijli ko adawat ho jin se gulchin ki nazar ho jin pe kaDi

wo phul hamesha kanTon ke pahlu mein guzara karte hain

ek wo bhi zamana tha apna main un ka nazara karta tha

ek ye bhi zamana hai apna wo mera nazara karte hain

rangini-e-duniya ke mani samjhe hain wahi kuchh ahl-e-junun

jo ghuncha-o-gul ko Thukra kar kanTon pe guzara karte hain

tu aur zara mohkam kar le pardon ki mukammal bandish ko

ai dost nazar ki garmi ko hum aaj sharara karte hain

main un ka azal se qail hun main un pe azal se mail hun

jo sirf nazar ki jumbish se bimar ka chaara karte hain

saghar se unhen ab kya nisbat mina se unhen ab kya matlab

din-raat 'aziz' in aankhon se jo dil mein utara karte hain